"Kum an liam in an thlum chin" tiah hla ah an chuang ko nain caan sung hi cu kum an liam hlan hmanh in an thlum cia ko rua ka ti. An liam sin in ngaih colh an si.

Nai Krismas cu ka tu Zing Hniang le a inchungpa Jerry Tial Peng nih tlawn an ka kawh. Thanksgiving ah khan an ka kawh cang i Florida ah ka kaltak hna. Atu tal cu tlawng khe hna ning ka ti. Zing Hniang (Nunu) he cun pu-tu aa kom ngaingai mi kan si. Kawi Peng he zong cun kan umtti ah kan inuam tuk. Air ticket man fawi ka ngiar lengmang i zarhteni ah ka cawk. Ahmasa in, Sui Hlei Cuai nu ka von hlen phot. Thau Ngun Lian ka si e, Florida in ka'n chawnh e ka von ti. Aa zumh pah, zumh lo pah khin a um i sau hlen ka zuam tthan lo. Dallas ah ka'n tlawng hnek hna e tiah ka chimh colh.

Nikhatni ka pok. Ka um nak khua cun vanlawng cit man fak tuk kaw Chicago i O'hare airport in hong icit la'ng ka ti. Champaign cun UIUC siangcacawng ca ah shuttle bus an kalter. 'Van' mawttaw a kal. Minung pa ruk nih kan icit. Nih kan chuah ning cu: pakhatpa a min an von hal. A chim. "Ziah campus chung cuka ah ka char te u law na kan ti i pei ttolak kan in hngah cu, atu mahka ah hin na rat kun?" an ti. "I changed my mind" a ti aisawh. "What's your airline?" a von ti hoi i, "Ticket ka caw rih lo" a ti hoi. Mizei fa buai dah a rak um ve kan ti. "What time is your flight?" a kan ti hoi i an chim cio. Ka pawng pa cu, "Na tanh ti lai maw, tuan zong cun naa thawh kun lo?" ka ti. "Ka tanh men ko lai, ka tanh lo le adang ka bawh lai" a ti ve. Hawihnu bik ah ka flight time cu a ka hal. "Six-thirty in the morning" ka ti. Hung tiah an ni dih. "It's gonna be a long night, man" an ka ti. Mah lecangka cun midang pa hnih nih, "Kannih zong kan flight time 7:50 e kan ti cu zinglei pei kan ti ve ko cu, airport ah kan riak ve ko lai" an ti. Mizei le mizei dek aa tong hna. O'hare airport cu vawleicung lawngbual hlung bik a si i mi an tam ko. Cun a kelkawi tuk i imer le ttumkai a tam. Mah airport ah cun zan ka riak. Ka Zahpi Lo cauk kaa rel pah, Daduhi sak mi Krismas hla kaa chuah pah. A nuam pah ko nain Dallas i Lai muisung hmuh lai kaa ngaih nak ah zan a sau ngai in ka thei. Khua a doi sin in kaa thawh colh i ka zuang ruangmang.

Dallas ka phanh hlan in hlacawn ka hrih cia i ka phanh cun kan itimlaam. Thing cehcheu ban tiatia kan cawk i inchung ah mei kan tuat. Ui kan thah lo lawng a si. Sacek kan cawk i sabuti ka chuang. Ngaknu an chuak rua lai tiah kan tha a nuam. Vanchiat ah, aho te an chuak lo. Pa lawngte an chuak. Nunu lawng nu. Alto a kan tlaihpiak. Awttha si kaw a kan chei ko. Soprano Jerry he kan sa i kan aw nih a chei hna lo i, Salai Ni Thang kan iruaih i, anih cu a aw ttha kaw, mah hnu ceu cun kan hlasak a tha a ttha. Van Dawt pa (Dr. Ceu Lian Thang) tenor. Midang nih bass. Jerry cu a lai zan in aa cawn cia an ti, a darling nih a phuan. (Hmanthlak ah hin mi kan tling lo, an ichap rih.) Ka phanhka ah cun ka cumpi nawn i ka bass a tlang taktak na'n bass an ka sak ter lo hih! Dinh caan ah capo kan sai pah i kan inuam ngaingai. Nunu nih, "Ka pu Hlun nih ngaknu torlak chuak hna seh ti a duh i pakhat hmanh an chuak lo i ka awi tuk, ha ha ha" a ti i a ka nih len. Kei nih, "Tthate'n na chimh cia hna lo hen cu, na ka deuh cikcek, na ka cham lai" ka ti. Capo cu kan peh i hehelaw tiah kan ni. Kan hlacawn mi kan duh tuk fawn. Kan cawn mi cu Bethlehem Arfi ti hla a si. Hniarlawn Hlaremh fung 14-nak i aa tel mi a si. Nain mahka ah cun ka bia ning le ka duhning in an sa lo. Atu cu ka duhningte'n ka cawnpi hna hnek. Mah hla cu Indianapolis zong ah an remh ve lai.

Athaizing cu Krismas lai ni a si. Saza Bawi Er thlaan kan va zoh. Kan kallei ah cun ilungsak bu te'n ka kal. Kirlei ah cun ka lung lawng a leng. Ka lung nih a hlam tuk rua. An inn ah kan taap i lakphak kan ding. Hmanthlak kan zoh. Mah dih cun kan ttin, kan ikholh ttawl i inn thar lawmh nak i kal ding in kan iserhsiam.

Pu Siang Awr le Pi Hlei Sung (Marilyn te) inn cu Pu Van Ni chungkhar nih vok in an lawmhpiak hna. Muika ah kan va phaan. Mi an rak tor. Dallas Laimi an tling rua ka ti, lengmi zong. Kan phanh in rawk kan ei colh. An rawl a thaw bak. Inn cu a chung le a pawngkam Marilyn pa nih a ka hmuhsak. Mah cun pumh a si. Rev. Zam Mang nih a kan hruai. Inngei nih thlacam awk an thawh. "Inn hi an rak cawk cio i, a man an pe thluangthluan kho lo i acheu cu an chuh tthan hna. Kannih zong thla khat ah $1400 hrawng lengmang in kum tampi chung a man pek a hau mi a si tik ah kan pek khawh lengmang nakhnga thlacam in kan bawm u" an ti. An chim mi cu upat awk ngaingai ah ka rel.

Pumh dih cun nunnuam tuah a si. Kan ingaih cio dih. Hla kan sa. Nunnuam tuah ah hruai hna ning law an duh. Nutung pawl nih an ka rikhuat. Mithar tuk ka si i ka ngamh lo. Caposai pawl an tho i an kan nuamh. Zinglei suimilam pa khat tiang hrawng maw kan inuamh zei dek. Mah hnu cu cun nunnuam aa peh kho setsai lo. Acheu khualeng ah an chuak i bia an va iruah. Acheu ngaknu thlah awk an bawh (he he, ka ruahnak). Acheu inn ah an va ttin ta. Kan ttiau pah dih. An laam leen rua lai ka ti i a laam tu khom an um set lo. Ngakchia Marilyn laam kan zoh. Tlawmpal ah, Salai Ni Thang nih ihnak khaan hrawng "lungkua" a va pilh luala i "ngaleng" pa khat a rak chuahpi. Houston ngaleng a si. Tukum cu tthiaziai in a um. Vei nih cun a rak ihnuh zuahmah, saihrem ngarul hnuh in. 'E, anih cu a "kuangkhumh" pei aa chuah cang ko khi, kan hawihawi' ka ti ah khin a ngaknu cu keimah sin ah a ratpi. 'Ziah a dawtnak a ngan ttung, mah fa hi' ka ti. Kan baan a kan tonh. Mah nu hi compei maw aa lamh hnga ka ti.

Kan baan a kan tonh cun laam ding kan si. Kan laam kho lo. An music a har tuk i laamthiam mi hmanh an laam kho set lo. Kan dir cawk ti lo i kan tthu. Ngaknu dang an an um set lo i midang nih an rak hnuh lengmang. A nau, ngakchia dok ngaknu dok khi a um i laam ka chim u law a ti tawn hna i aho nih an chim lo. Nepna ah keimah tu "Ra, laam usi" a ti i a ra ka hnuh. Laam rilmal tiah ka tho i saulak kan laam, capo laam in. Lucy le ka pa laam bantuk. Kan nih a chuak pah. Chun ah kan ican cang i faaklak in a ka lonh, mah mitthanglio nih cun. Kan laam cawk ti lo [hlabia]. Tlangval dang umhar ka hmuh in ngaknu kawlpiak hna ning ka ti i, inchak thlam te chung va bih nalak ah Halkha ngaleng pa li an rak um ko. Athaizing ei awk sa an rak sersiam cuahmah. "Chuak u law laam u, nan ttale an um a har. Sa cu midang nih ser hna seh" ka ti hna. Arannak in pakhat ka rak chuahpi, laam thiam bik Abo. Mah cun ka ttin.

Dallas Lai ngaknu duh an nun khun nak a um. U-nau u-nau in khuah sarih hrawng an um i an idawt ning le an ikomh ning bak cu! Ka zoh hna ah duh an nung tuk ka ti. An umkal lai zong ah an ihngak i hmunkhat te ah. Atu kehlei i hla a sa mi hawl zong hi u-nau an si. Unau aa rem lo hrimhrim um dawh an si lo. An relationship aa dawh tuk. U-nau ikomh a nuamh ning cu ka hngalh cia a si. Mahti i an u-nau an ikomh le an umkaltti lengmang ah cun thilsual zong in an ikilveng kho deuh ngaingai lai. Unau aa kom mi hi an rawk tuk rua lo ka ti.

Dallas Lai mino cu hruaitu ttha ngei hna seh, an lung inge seh, law khua an nuamh tuk hnga. Sersiam awk an ttha tuk. Nu zong pa zong hrang (talent) tthattha an ngei. An muisam a za. An thluak a tli. An leklak. Hlasa kho an tam (Lai hla bel nih a challenge ngaingai hna rua ka ti). Cacawng an tam. An smart. Atu lio USA Laimi ah, Dallas ah hin cacawnglio an tam bik an ti. Aa tim lio mi zong an um lai. Acheu cu English an cawn lio a si rih lai nain tlawmpal ah ca taktak an cawng kho cang lai tiah kan iruahchan. University taktak a phaan cang mi zong an um. Pa pawl beer an ding tuk deuhvak ti ka rak thei hna mi zong, hmaan dawh a si lo, vantthat ah. Zoh taktak ah ari abah tuk ka hmu hna lo. Anmah tlangval hawikom rual lawng inuamh hmang lo in an naule zong nuamhnak hrawm ve hna seh, an farle he zong ikom ngai in le mi hmai ah icercawi veve in tlonleen uar hna seh law an inuam tuk hnga dah ka ti. An farle zong an ilawm ttheu hnga. Cuti i mino an ipakhah khawh ah cun, upa zeitluk hmanh in an lung idang ko seh law mino idawtnak nih a ttem hna lai, a sengh hna lai, upa lung aa tong lo cu ningzak ah an chiah hna lai i mino cu kan izohthla tuk hna lai. Atu hmanh ah kan izohthla cang hna.

Part 2
Part 3
Part 4
Part 5