free host | free hosting | Business Hosting | Free Website Submission | shopping cart | php hosting



KRISMAS KA NGAI COLH
3

Cinte

Krismas pumh ttian dih cun Marilyn te inn ah hla nuam kan sa hna lai ti a si. Leen hla le zuun hla kan sa hna hnek. Zuun Hla vol. 1 cauk special i Nunu ka rak serpiak mi a um i a kan chuahpiak. Mifel ah Iangku keng law kan ti. Ka thil kaa thleng i Marilyn te inn ah cun kan kal.

Dallas Lai mino hi hlasa kho an tam ko nain Lai hla a thiam mi an tlawm an ti. Puai nikhua i hla an sak ah Kawl hla le Mirang hla lawng an sa an ti i upa lung a tling lo. Lai hla leen hna seh ti an duh hna. Keimah Dallas ka phanh cu cherhchan ah an iserh--Lai hla a sak pi hna lai ti in. A caam chung ah Lai hla sak pi lengmang hna seh law thiam in leem hna seh ti an duh rua hna, mino cu. Dr. Chum Awi nih voi hnih le voi thum te a ka caihpi. Kei zong nih ka duh ve. Krismas zan ah cun thok kun tuah usi lawu kan ti, Marilyn te inn ah cun. Kan tam nawn. Mino zong an tthahnem. Tingtang zong anmah pek hna awk kan si nain hla a thiam setsai lo mi tingtang tlaihter cu a bonsang tawn lo i kei le Dr. Ceu Lian Thang nih kan tlaih. Kan inge ngaingai. Pu Sang Mawng nih hla a au. A aw a ttha i a kan chei bak. Hla cu kan sa thluahmah. Hla hlun tete hon sak cun, "leeng cia kan u le sunghno an nule zong an hrinthar hniang he lung an hlau". Hlanlio hla leen cia Dr. Chum Awi le a inchungnu zong nih tlo leen in an kan sakpi. Chan hnu deuh "leengcia" pawl zong an lung a thar. Innngei Pu Siang Awr zong a kutbengh a ttha. Zing ah Krismas le inn thar lawmh laksawng ah Za Zi CD ka chuah i, ka pek lecangka in CD player ah a rawn colh i thang taktak in a chuah mi a si. Phih khom hngal ti hlah. Halkha tlangval ttha Tial Hnin zong a kut aa hler i a kam in a rak laam leen. Kan kharuseih a tho hih kan ti.

Van vate bang khin zuan thiam ning law,
Ka zuang hnga nitin in nunnem sin,
Cu bang in si ttung lo cu ka thin cu,
Ka liam sual rua hnga Ricin tlang in.

Nunu solo sak an hauh. Kei zong nih ka fial ve. Hla a ka sak piak tawn tu a si i atu hi a hlasak ka theih lo nak a sau cang i ngaih ka duh ve. Pa pa khat nih tingtang a tumh. Caang khat nak le a nolh nak a sak i a ngol. Aziah dah mah kha na ngol tiah ahnu ah ka hal i, "Mah bantuk tingtang tum khan aho dah a sa zuam lai?" a ka ti. Hla tluang cu zuzu te'n tum awk a si ko na'n chanthar mi hi an tingtang thiam langhternak ah ahriah i hriah le acoih i coih thulh le linsa ngai i tum tehna an hmang pah rua. Mah bantuk cu Lai hla he aa tlak zungzal theng lo. Lai hla cu cinglit-cinglit he aa tlak bik ko.

Solo sak cu Lili (Miriam Lili Sunday) zong an thiah ve. Anih cu Lai hla a duh mi a si. Zei hla ko dah aa thim lai ka ti i, ngelcel ah, ka hla duh aa thim. Hladuh ikhah zong hi a nuam pah in ka thei (cuca'h dahkaw hla tampi ka duh). Mah dih cun solo sak kan phih. Mibu hla nuam sak hi control a hau. Tthate i control lo ah cun hlasak a tho lo. A rawk ttheu. Control ding bik cu:

1. Solo sak: Abu i hla nuam sak nak ah solo thiah a um/tam ah cun hlasak a rawk. Cuca ah solo sak cu phih ding.
2. Capo saih: Capo an saih pah ah cun hla feeling a lo dih i hlasak a tho ti lo. Hlasak lak capo saih cu phih bak ding. Capo saih nak ah capo saih i hla sak nak ah hla sak ding a si ko.
3. Biachim: Biachim a um ah cun, zei bia a si hmanh ah, hlasak a rawk.
4. Laam hnuh: Lai zuun hla sak ah hin a laam mi an um lengmang. Mah lungtho te i laam ah cun nuamh zong a nuam. Lungtholo an hnuh hna belte ah cun hna an hnawh hlei ah hlasa tu an izuk.
5. Zu vuai: Zu a vuai tuk mi an i-control setsai lo ah cun au thlorh in an au, cawl thlorh in an cawl i hlasak a nuam lo.
6. Eidin: Nuamh lio i eidin an ser ah cun nuamh a rawk. Laimi hi ei serh kan sunh ngaingai i achel ah cun puai kan hrawk ttheu. 'Atu ah ei maw kan duh deuh nuamh' ti hi ruah a hau ttheu.
7. Tingtang: Lai hla sak sawhsawh nak ah tingtang tum thiam tuk a hau lo. Tingtang a thiam tuk mi kan herh hna lo. Lai hla tingtang tum sawhsawh cu aho poh nih thiam pah cio dih a si ko i, tingtang a thiam tuk mi nakin hla niamsan tah a thiam mi, hla bia he aa tlak in nuarh ding le ranh ding a hngal mi, hla ithawh lecangka i a tlai/la kho colh ding mi kan herh deuh hna. Tingtang khawn lawng an thiam i hla an hngalh ttung lo ah cun an kan laklawh ttheu.
8. Sak ve: Tingtang a tum tu nih tlo te'n hla an sak ve a hau. An sak ve ding ttung lo ah cun a sa ding mi sin ah tingtang chanh ding a si.

Kan hlasak cu kan control nawn ve. Mino nih le Lai hla cu iziak rih hna hlah kaw, achel i capo saih le nunnuam tuah pah an duh. Kan onh ah cun kan hlasak a zuva lai ti le kan phang. Cuca ah kei nih rumro nawn in capo saih tehna cu ka phih. Indianapolis zong ah mahti cun kan rak control i kan tluang. Atu cu aana a ting e ti in mino cheukhat an lung a tling lo an ti. An bia zong ka theih. Tuk a sum. "An polite ngaite" cuta ka ti hna.

Krismas thaizing ah maheh thah an hrih i a zanlei cu mi inn i rawl ka hrawn nak in ka va lan ve. Mi kan tlawm nawn na'n maheh sa le zeidang thawng pah in kan inuam. Ka paw a khim ngai na'n hlacaang cu ka au khawh tthiamtthiam. Hlathiamlo hmanh an inuam, vei thawng pah in. Ttim hnu deuh ah kan ttin.

Lai mino lak ah Lai zuun hla a nehsawh mi an um. Mah hna cu zeitluk in dah music kong an hngalh tiah hlat usi law, an hla uar mi hi zei music phun a si ti hmanh a hngal lo ding an um lai dah. Hla minthang chimhramh fung kua-hra hmanh a chim kho lo ding zong an um lai. An hla uar mi fung khat hmanh a sa kho lo ding zong an um lai. A sullam set a hngal lo mi zong an um lai. Mah nih cun kan Lai zuun hla cu an hei nehsawh ve. Lai hla cu itthen nak hla lawng a si e tiah hawi hngalh cia an hei chim ve. Music genre hi an hngal taktak hnga maw? Classical music kong chim usi law tah zei a si an hngal hnga maw? Ka zuum tuk hna lo.

Lai zuun hla nih hin Lai literature le music a kemh. Kan sak tik ah ngaknut-tlanval in kan ila lo. A hlabia zong kan ilak theng lo. Kan ram i kan tlonleenlio ngaih nak le kan bia le hla a thlum-al tem nak tu ah kan hman. Laam le kui a chei ti lo mi rual-u pawl ca ah cun hla nuam sak hi kan inuamh nak a si ko cang.

Lawmh awk a si mi cu: atu hi Lai hla cu USA ah a leng chin lengmang cang. Nai te koko tiang i thawng ka theih ning ah, Maryland hrawng ah cun hlacawn dih poh ah zuun hla an sa lengmang an ti. Michigan zong ah nuam tuk in an sa an ti. New Jersey zong ah ngol an siang lo an ti. New York hrawng cu a cauk hmanh tuan te i a ngei cia an si. Florida cu an tlo leen cang nak a si. Indiana tu cu a hmunpi bantuk a si. Illinois cu a sem nak a si. Atu Texas zong ah cun, zaan hnih thum cu kan sakpi cang hna i, leen tuk rih hna hlah hmanh seh law a ci cu aa tuh cang tiah ruah a si. Capo i, "Na crusade a awngmin tuk" an rak ka ti mi cu atu ah cun "Na meiduah a kaang tuk" ti ka si cang. Tthal khuapau meithang zam i fing le tlang a cul bang in, zuun thli le zuun hla zong nih ram kau a cul cang. Zoh Hmanh U, Lai Holh A Leen Nak Ram Hna Khi tiah Dr. Chum Awi nih a rak ti i, cu ram chung ah cun Lai Hla zong atu cun a leng thluahmah cang lai. A thiam mi inuamh deuh a si lai; a thiam lo deuh nuamhpi hau an si lai. [Cabia]

Part 1
Part 2
Part 4
Part 5