Dallas December 28: Ni Bor Sung le Chan Awi Thang tthit-um nak taktak tuah ni a si. DCBC biakin ah cun kan vong lut. Methodist biakin a si i chan hlun ta, Johan tehna aa suai dih mi khi a si. Mui demdum in. Ka ngamlo phun tuk a si. Pulpit le ttuang aa hlat tuk. San le a sang. Ngan le a ngan tuk. A mui tuk fawn. Hman le video ithlak zong ah naktthup i a um ding a si. An hruaitule nih chanthar sak mi biakin niam deuh kawl hna seh law a tthat hnga hita ka ti.

Pumh nak ah cun Rev. James Tial Lian nih phung a chim. A chim mi cu, "Kan lak ah khuachia kan um sual maw?" ti bik a si. A fanu tete pa hnih nih hla an sak. Annih cu Dallas Lai ngaknu u-nau ah a no bik khuah an si nain Lai hla an sa kho, voidang ah. Boston lei ah aa tthial ding an si an ti i Dallas mi cu an cawilet ttheu hna lai.

Dallas Chin Baptist Church cu atu hi biakin an rian cuahmah. A hmun cawk i sak an itim. Khuakhang tawn cia u le pa an um i an lung khua a phaan ngaingai. Biakin hmun an cawk i an sak khawh tik ah cun nau umh nak zong sak chih an duh te men lai dah ka ti. USA ah nau umh manh a faak tuk (an nule ttuan man zat deng liam a hau). Nau siang an ser khawh ah cun Laimi pa khat zong nih khin nau hnihthum a umh hna hnga i, anih ca zong ah rian a um hnga. Nau zong Lai umh in an umh hna hnga, Lai holh in an chawnh hna hnga, Lai nauhla zong an chimh pah leh hna hnga. Mah cu u le pa nih a ruah ve ttheu lai dah ka ti.

Cuti i biakin an rianh kong an chim ah, Lai Ram tthancho nak rian ah an tangka thazang a zor deuh ttung lai ti in ka lungre a thei nawn. Zarhpini ah bia tawi chim nak caan an ka serh i mah zong ah cun ka chim. Asina'n an krifabu lutlai (chairman) nih ramser rian hi cu ruah le ruah lo a si ko e a ti i ka hna ngam pah tthan. Atu tiang rih tu ah cun DCBC cu thazang an chuah kho ngaingai ko. CCC ca ah kum khat $5000 thawh an itim i kum luancia ah cun an tlinh rua, Rev. Ngun Awi chim ning kaa theihpalh lo ah cun. Tukum hi a challenge rih hna, mah tangka thawh nih cun. Zeidang kong ah an lung aa khah le khah lo ka hngal lo nain CACC le CCC cu an hmurka nih a ttanh dih i an thinlung tak zong a si lai tiah zumhnak ka ngei. Ka tha a um.

Mah ti i tangka thazang an chuah khawh nak pa khat cu, pasatorte an ipek ruang ah a si. Atu tiang ah khin an pasatorte khi hlawh ngei lo lawngte in pasator an ttuan. Kum thum chung lahkhah i an ei hnga ding mi tangka cu ei lo in an um i Lai Ram ca ah an hman. Zei can dah mahti cun an izuam khawh lai ti kan hngal rih lo. Hlawh ipek an ngeih rih lo ruang ah atu tiang buai lo te i an ipakhah khawh zong khi a si. Pasator hlawh pek a chuah cun krifabu hi aa tuai ttheu, bu tthen zong a paw i annih tu cu an ituai lo, an itthen lo, atu cu.

Bia iruah nak sawhsawh i mi an zai ka theih mi cu, achim kel le achim kel lawng nih phung an chim i a kan simh; pumh zuam zong a si ti lo ti a si. Mah cu hmun hnihthum ah an chim. An chim nak ah cun, mi tam deuh nih phung hi chim hna seh law athar zong a tam deuh hnga, chim awk zong kan ngei cio, pasator lo zong phung chim thiah pah ding an si, an ti. An secretary chim ning ah le pasator lo phungchim thiah cu, ti a si. Pasatorte cu krifa nun rawl a kan fahtu an si i, pasator lengmang nih phung cu chim awk a si ko ti a ruat mi aa um lio ah, Laimi cu phung chim cio duh a si.

Dallas Lai krifa sin ka caam chung kaa lawm ngaingai. Khua a ruat nih leen an ka sawm, rawl an ka kawh i Illinois i ka ei bal lo mi nimte sa zong ka ei, ce-u an chuan mi zong ka ei, arsa chihlaam phulh zong ka ei. Maheh sa zong an ka ei. David Van Dawt Thang (kalthiamka) he kan ituai. Mitthlam ah a cuang rih. Mino leng le vaal he hmaipanh in kan ichawn. Siaherh in kan itthen.

Ka philh hin hlah u, leng le val mi hna,
Kut zattial itlai in kan itong tthan lai,
Duh tlon tthul lo in seem nak lungrawn ah,
Par bang kan par tthan lai.