Kei cu ka kal cang lai e,
Ka khua lam hlaat riangmang,
Rung um ai law samthlairem dawh te,
'Co rua kan si ttung ri lo.

December 29: Mit hnuai chom in kan tho i kan pok colh, airport lei ah. Nunu le Thangthang nih an ka thlah hnek. Kevin Thang cu bia le hla (literature) a upat mi a si i mah thawng cun u-nau zoh in kan izoh. Dallas ka phanh zong ah amah nih lawngbual ah a ra ka laak. Atu zong zan a ka riahpi i zing ah a ka thlah. Kan pathum cun bianuam kan iruah pah i lawngbual ah cun kan kal. Damte'n kan iti i kei cu achung ah ka lut colh.

Ka vanlawng cu a zuang diam cang e an ti. Vanlawng dang a tampi ko lai ka ti i ka zei te a poi lo. Ka phanh caan cu next flight ca ah a za bakbak te a si. Next flight ah cun ka zuang ve tthan. Vanlawng cung ah cun coffee kha taktak kaa din i, C. Luri hla ka ngai pah. C. Luri cu Mizo hlasa a si. A pa hi thlarau i hrin nolh mi a si i a pa hlaphan cu "hnauh-aw in" a sak hna i, civui ttian ni ngaih awk phun ah cun a ttha tuk. Zumhnak thazang a pe tuk. Pathian thluachuah rel nak hla zong an um.

Lawmh Hla

Maw Bawipa, lawmhnak bia ka chim,
Thluachuah malsawm phunkip le,
Bawi Zisuh na ka pek ca ah,
Khamhnak sung cu ka hmu ve.

Na sin ah lawmhnak bia ka chim,
Ei le din fenh-aih vialte,
Nitlang ruahsur le thli thianghlim,
Thluachuah malsawm phunkip he.

Na ser mi awthawng ngaih nuam le,
Rong mawi phunphun ka hmuh mi,
Minung thilser aphun zakip,
Thluachuah malsawm phun kip he.

Ka ngaihchiat i a ka hneem tu,
U le nau dawtu hawikom,
Kal sual nak in a ka kil tu,
Krifabu na ka pek fawn.

Thih ngaihchiat nak ka ton lio i,
A ka hnemtu hawikom le,
Ka ngaihchiat a ka chawng tu ah,
Dawtu na ka serpiak i.

Maw Bawipa, lawmhnak bia ka chim,
Ruahchannak lawmh awk tlak mi,
Zeizong remh tthan nak caan sunglawi,
Thluachuah malsawm phunkip he.

[A hla ka ngaih lo lio ah ka leh i a hmaan pah ko hnga lo dekmaw]

Hla nih cun ka lung a laak dih. Lai krifa hi thluachuah rel kan hngal in kan thiam ve hnga maw ti zong ka ruat. Kum khat chung i kan co mi thluachuah hi kum dongh lai tal ah kan kan rel tawn maw, Lai krifabu cio ah, "Tthachin pa khat hnu pa khat rel tuah" ti hla (ZBC 354) ithawh an hngal hnga maw ti zong ka ruat. Kei tah kaa ti. Ka thluachuah cu ka rel hnek ve. Tlawmpal ka rel ah ka rel cawk lai lo ti ka hngalh. Dallas Lai mi mithmai panh le hmurka ttha (hugs and love from Dallas) ka ton mi zong cu ka thluachuah ah cun ka rel chih hna.

Tuante ah O'hare lawngbual ah cun kan ttum. Khua a rak dawm in a kik pah. Abraham Lincoln le Albert Ceu Hlun an leen cia nak Illinois i a khuati cu ka hngalh cia si kaw luchin le kuthrolh kaa ken cia i kaa chuah zokzok. [Ka hngawngngerh hi nikum Krismas i mi dawtnak ka co mi a si. Kaa hnuh mi thil ah a raang mi khi cu mi thilkuat a si--maw Laimi le thilkuat]. Ka tlun azoh um lem hna hlah tiah Champaign i tlun colh duh lo in tlawnglawng kaa cit i Chicago khuachung ah ka va leng. A nuam tuk. Holidays period si kaw thuam tthattha he an chuak i, no he tar he lam an khat. Michigan Avenue hrimhrim cu an lunh ngaingai. Kaa chok ve. Eidin dawr i luhchuah a nuam. Nuamh dawh a si ai tiah restaurant le bar zong ah ka lut ve. Pu Biak Ceu i, "hawi din mi poh ading ve mi" a ti bang in, hawi nun cawn nak ah hawi din cio cu tlaruam in kaa dinter ve, thlumzuk khin. Ka khua a lum deuh. Skate aa cit mi mitampi ka va zoh hna. Museum ka zoh luklak. Kaa chok i Chicago inn sang tang ka phanh ah, 'Sear Tower ah hin kai tuah ning, vawleicung inn sang bik rilmal' ka ti i ka kai. Dot 94. Khua a lang tuk. Hawi ka hlam ning cu! Texas i muisung tete kha um ve hna seh law kan inuam tuk hnga mu ka ti. Ka tlunlai hmanh fiang in ka chim ta hna lo, Kumthar tiang um ding dawh in ka rak chim. Tlunlai zan nuamh zong ah ka chuak ti lo. Atu cu tluang dang pi ka phaan cang. Ttelifawn le e-mail tal in hmurka aa tong kho te hnga maw?

An chim Zawl Tling le Ngang Bawm bang,
Tluang dang i ka hraam zawn ah hin,
Ttelifawn tal in ka chawn law,
Ka dawt, kei lung ngam nak ah.

Thlanglei vairang ca kan cawn ah,
Ka dawt nang lo leen a har ko,
Khua cuan la'ng Sear Tower cung in,
Ka dawt leen nak lang hnga maw.

Ka dawt, ka lung ka chia kho lo,
Nang lo cun ka tlei kho hin lo,
An ser mi maivanca tal in, [e-mail in]
Lungthlibia kan chim ko lai.

A cung ka phanh ah henta, Sear Tower cu pinlei ah ka hei hmuh. 'Awh, atu ka kai nak hi Sear Tower a si kun lo mei i' kaa ti. An rong aa khat, a cung i fung aa sawh mi le aa khat, san le a sang ve i, Hancock Observatory tu ah ka kai cu a si. Sear Tower kai in ka hei kai. Carel daithlan cu mah ti ttheu hin ka ti. Nuamh tu cu a nuam ngai ve. Khua a lang tuk. Chicago khua le Superior tibualpi le a kam hrawng a lang dih. Michigan le Wisconsin hrawng zong durbing cun a lang. An leen nak Texas bel cu a lang kho lo. Mit hmuh lo tlang hra dan ah a um.

Zanlei suimilam 4:00 in Champaign ah cun ka tlung, tlanglawng in. 6:30 ah ka phaan. Zan ka riak i ka tha a dam ah khin, Pa Bik nih, "Kumthar Indianapolis i hmang ding in na ra lai" a ka ti. An itimh ning ah cun, hawi pa hnih thum he ka khua ah cun rat, billiards kah ra zuam, duhsah i Indy i kir khi an rak itim. Nain pa Tin ngaihchiatnak a tong i hawi cu an ra kho tthan lo. Amah lawng a ra. Spring Field in Moses Thawng Lian a ra ve. Zan suimilam 10:00 in kan ithawh. Thla a vang ngaingai. Lampi ah Hnianghniang hla kan chuah pah. 2001 kum Krismas zong ah Salai Daniel le Salai Thla Hai he mahti cun nuam ngai in kan rak kal cang. A rak nuam. Atu zong a nuam. Indianapolis cu ttim hnu ah kan hei phanh. Mid-Night Service kan tanh ti rua lo tiah inn ah kan lan. Pa Tin (Thantlang Cinzah Tin Lian) kan tthutpi. Kan riak beh. Kumthar tu cu krifabu sin ah kan hmang.

Kumthar zan bak cu, ka tlun inn ah "bahleu" pawl anmah chuah in an chuak ciammam i kan tling. Inn kan khat. Bah-leo sullam cu: varit khi a tar ah cun a feek a sau in aa kuai i a feek in kan kutdong ah bah khawh a si. Mah cu varit bahleu ti a si. Sakhi zong khi a tar mi cu a ki aa kuai i a ki in bah khawh a si ve. Mah cu sakhi bahleu ti a si ve. Mah biafang cu Hniarlawn ngaknu tlangval nih an hman i, leng upa le vaal upa cu "bahleu pawl" tiah an ti hna. Bahleu lawngte cu ttuang ah kan ihawng ko. Zu a ding zong um hna hlah. Fim hirhiar ciote'n. Bia aa ruah na, dawl aa cuh na, hla a sa na aa si. Kei nih dawl kaa cuh pah in hlasa pawl cu hlacaang ka auh hna. Mah na cun kan thahdeng hna hih! Mah zan cu phekah ka thiam pah. Voikhat bel cu an kan kawt ve. Ahnu cun hlasa sin ah cun kaa tthial ve lawlaw. Leen cim lo vaal cang le leng ttul lawngte cu kan si i:

Nang zong leen cim lo,
Kei zong leen cim lo,
Kan pahnih leen cim lo

ti in zan khat nuamh cu kan inuam ve sawk. Maryland lei kan hawile zong an um ve i mahhangso cu kan si. [Mahhangso ti hi Hniarlawn bia a si. Ramriah tik ah khin sapipa an kah lo zong ah sa hmete an kah ah cun, "mahhangso" cu kan si ti a si. Mah bia cu an laak i, "kan inuam pah ko" tinak ah, "mahhangso cu kan si ko" an ti ttheu i ahnu cun Halkha hrawng zong ah an hman ve cang.

2003 kum chung i ka rian biapi cu fimnak cawn a si nain, zaang hlei i ka tuah mi ah cun, cattial hlei ah, Lai zuun hla sakpi hi a si. Kumhmasa kan ram i ka tlun lio zong ah ka sakpi taak hna. USA i ka ra kir tthan hnu zong ah ka sakpi hna. Von ichimthiam ta ning law, hla hi ka duh bang in, keimah tluk i hla tam a zawn kho mi nan um lai tiah ka zum lo--Mirang hla, Kawl hla, Lusei hla, Lai hla. Krifa hla, leen hla, zuun hla, zatlang hla, pupa hla. Mirang hla hi ahlan te'n ka rak duh ngaingai i, Zenkung i sianghleirun ka kai lio ah Mirang hla uk khat ka rak ittial i a bia ka zah dih nawn. Sai Hti Sai hla zong khi a bia zoh lo in fung tampi ka zawnh khawh. Lusei hla khi, zuun hla zong leen hla zong krifa hla zong, hawi thiam mi cu ka thiam dih ve tiah kaa ruah. Cawmkhuang he mithi tthutpi nak hla belte ka chei lo. Lai Krifa hlabu zong hi ka zah mi a tam pah i hla cauk ken lo zong in kaa pum ngam pah ko. Hlaremh zong tam pah ka thiam ve. Solo i an sak mi belte ka zah hna lo. Pupa hla hi keimah thawh khim cu ka thiam ve lai. Lai zuun hla le leen hla zong hi ka zah mi a tam. Zuun Hla cauk hi hei lo seh law keimah lawng hmanh nih tamlak ka ttial tthan khawh lai tiah kaa ruah. 'Hitluk hla a duh lai ti a hngal na ko ah, aziah dah Pathian nih aw ttha a ka pek hnga lo' ti ka ruah zawn ah hin 'thluak ttha a ka pek ko, mi ca i santlai ding in' ti ka lung ah a chuak ttheu i kaa hneem tawn. Hla i kan theih bang in, mi thluachuah kan hngar hnek tik poh ah Zisuh i pek a kan duh mi thil ruah a hau tawn.

Caan hi an hlun chin lai, a thlum chin lai. 2003 kum Krismas Dallas i ka hman mi zong hi a thlum chin ve lai. Caan tthing ah a cang lai nain thinlung ah a thar lai, khuamawchel ah. Pu Do Khan Thang nih caan hlun ngai in hiti hin hla a rak phan ve:

Liamcia caan ka ruah zawn ah,
Kir tthan e zaal ti lo ding in,
Tlai ninucer liam aa tim,
Lunglen hi a phawh tthan hoi.